Amacebiso okonga umbane anokunciphisa iindleko zakho zombane

Njengoko amaxabiso ombane enyuka, ukugcina indawo yakho ipholile kwiindwendwe kunokuba zindleko. Njengombuki Zindwendwe, ungacela iindwendwe ukuba zijonge indlela eziyisebenzisa ngayo ihitha, indlela ezipholisa ngayo neziwasebenzisa ngayo amanzi, kodwa akufuneki uthembele kuzo ukuze uhlise ityala lakho likamasipala. Ukwenza izinto eziza kuphucula indlela indawo yakho ewusebenzisa ngayo umbane sisicombululo esingcono. Loo nto inokukhokelela ekongeni imali eninzi ize incede ekukhuseleni iplanethi.

UAirbnb usebenzisana neengcali zokukhusela indalo ukuze anike Ababuki Zindwendwe amacebiso nezinto eziluncedo zokulungisa izindlu zabo. Ukuze uqalise, zama la macebiso avela kwiEnergy Saving Trust, umbutho waseU.K. onobuchule obukhethekileyo bokunceda abantu banciphise indlela abawusebenzisa ngayo umbane nokukhutshwa komoya owonakalisa izulu.

Iindwendwe zidla ngokulindela indawo ezinokuyenza ifudumale okanye iphole nenamanzi ashushu. Ungazifikelela izinto ezizifunayo—uze uthobe iindleko zakho—ngokuphucula izinto ezifudumeza indlu yakho neziphucula indlela amanzi asetyenziswa ngayo.

• Ukuvingca umoya kwiifestile, eminyangweni, kwiitshimini, ezikhewini ezijikeleze imibhobho, neendawo ezikhupha umbane ukuze kuthintelwe ukuphuma komoya yindlela engabiziyo, esebenzayo yokonga umbane kulo naluphi na uhlobo lwendawo. Isixhobo esinqanda ukuphulukana nobushushu, i-caulk, ii-gaskets zegwebu, ii-blinds ezinqanda ilanga neekhethini ezisindayo okanye neekhethini zeleyisi zonke zinokunceda ukunqanda kokuphuma kobushushu.
• Ukufudumeza izinto ezifudumeza amanzi ezindala ukuze ugcine ubushushu nokufaka isixhobo esibala ixesha ukuze ungafudumeze amanzi xa indawo yakho ingasetyenziswa kunganceda wonge umbane.
• Ukutshintsha imibhobho yamanzi eqhelekileyo uze ufake ivalvu zendlu yangasese ezikhupha amanzi kancinci, iitephu, neentloko zeshawa kunokunceda kunciphise isixa samanzi asetyenziswayo. Iintloko zetephu zeshawa Eziphuma Umoya zixuba umoya namanzi ukuze zigcine iphresha iphezulu ngoxa zinciphisa ukusetyenziswa kwamanzi ukuya kutsho kwi-4.25 yee-gallons (iilitha eziyi-16) kwishawa nganye. Ngoxa usenza loo nto, hlala ujonga uze ulungise naziphi na izinto ezivuza amanzi ukuze uthintele inkcitho.
• Ukuhlamba izitya xa ugcwele umatshini wokuhlamba izitya uze umatshini wokuhlamba/wokomisa iimpahla ubekwe kwimowudi yobushushu obusezantsi okanye kwethi “yonga” kunokonga amanzi nombane. Ngoxa ulungisa indawo yakho uyilungiselela undwendwe olulandelayo, khupha izitya uze uxhome amashiti ukuze ome ukuba kunokwenzeka.

UAnna, iSuperhost nelungu leQumrhu Labacebisi Lababuki Zindwendwe eNewgale, eWales, usebenzisa izinto zokuhombisa ezifudumezayo ukuze zihlale kamnandi iindwendwe kwizindlu zakhe ezisemaphandleni. UAnna, osebenza kwikomiti yebhodi engokukhuselwa kwendalo uthi, “Sifake iiragi kwimigangatho yamatye endala neekhethini ezisindayo ezivalela umoya.” “Zisinceda kokubini sihombise izindlu zethu zize zisincede songe umbane.

Iindwendwe ezininzi zifuna izinto ezinokusetyenziswa njengekhitshi elinento yonke ne-wifi enokuthenjwa. Ungonga umbane owusebenzisayo kungakhange kuphazamiseke indlela ozibuka ngayo iindwendwe.

• Ukutshintsha iiglowubhu usuke kweze-incandescent neze-halogen ufake iiglowubhu zeLED kunokwenza wonge i$4 ukuya kwi$16 yeedola zaseMerika kwiglowubhu nganye ngonyaka.
• Ukufaka ii-sensors nee-plugs zezibane, ezibiza imali encinci nekulula ukuzifaka, kunokunceda uqinisekise ukuba izibane azishiywa zilayitiwe ngempazamo. Izixhobo zokuva umntu ohambayo zinokonga umbane ngokulayita nokucima izibane ngokuzenzekelayo xa ziva ukuba kukho iindwendwe.
• Ukutshintsha izinto ezisebenza ngombane xa ziphelelwa uze ufake ezonga umbane kunokonga umbane. Ukukhetha ifriji yomgangatho ophezulu kunokuba nefuthe elikhulu kwiindleko zakho zombane ebudeni bokusebenza kweso sixhobo.
• Ukukhupha izixhobo ezincinci embaneni, kuquka iitshaja zefowuni xa zingasetyenziswa, kunokunqanda nantoni na etya umbane ngokungafanelekanga. Enye indlela kukuzikonektha kwisixhobo esonga umbane xa izinto zingasetyenziswa okanye kwiswitshi yobugcisa onokuyicima ukude xa indawo yakho ingenamntu. Ukucima izixhobo ezahlukeneyo ukuba zingasoloko zikwimo yokulinda kunokukunceda wonge malunga ne-5% kwimali yombane oyibhatala nyanga nganye.

UAnna uthi, “Ininzi into ebandakanyekileyo ekucoceni nasekuhlambeni. “Ukusebenzisa umatshini wokuhlamba nowokomisa impahla osemgangathweni kubalulekile kum xa kufikwa ekongeni umbane.”

Ibali olibalisa kwingcaciso yendlu yakho linokunceda lixhase izinto ozenzayo ukuze kukhuselwe indalo lize lichaphazele indlela iindwendwe ezonwaba ngayo.

UAnna uthi, “Ndicinga ukuba eyona nto yenza umahluko kuthi kukwenza ‘oko sikukholelwayo ngokukhuselwa kwendalo' kucace kakhulu kwindlu yethu. Ungachaza indlela okuthanda ngayo ukukhuselwa kwendalo nezinto ozenzayo, uze emva koko uhambiselane kakuhle neendwendwe eziyikhathaleleyo njengawe indalo.”

Ukuthetha ngokukhululekileyo kukhuthaza iindwendwe ukuba zilandele umzekelo wakho. UAnna uthi, “Kakade ke, sifuna iindwendwe zonwabe zize zihlale kamnandi. Kodwa ukubeka izinto ezilindelekileyo kwindlu yethu ngendlela esizama ngayo ukonga umbane kunceda kuthintele ukuziphatha okungafanelekanga, njengokubasa ihitha uze uhambe imini yonke.”

La ngamanyathelo nje ambalwa onokuwathatha ukuze uphucule indlela indawo yakho ewonga ngayo umbane. Utshintsho olukhulu, olufana nokufaka iiphaneli zesola, ukutshintsha iifestile, nokuphucula indlela indlu eyogqunywe ngayo, kunokukunceda wonge ngakumbi. Izinto ozitshintshileyo zisenokukufanelekela ukubuyiselwa imali, ukuncitshiswa kwerhafu etsalwayo nezinye izibonelelo.

Funda okungakumbi ngokwamkela iindwendwe ngendlela engayonakalisiyo indalo