Coca njengenkcutshe ngala macebiso eengcali

Ukucoca kakuhle qho kuphuma ibe kuza kungena ezinye iindwendwe kubaluleke kakhulu ekubukeni iindwendwe ngendlela efanelwe zinkwenkwezi ezintlanu. Esinye sezizathu eziqhelekileyo ezibangela iindwendwe zinike Ababuki Zindwendwe iinkwenkwezi ezingaphantsi kwezihlanu kukungacoceki.

Ungavumeli uthuli, amabala okanye amavumba abeke ibala indlela ozibuka ngayo iindwendwe. Zama la macebiso avela kwingcali yokucoca uDiana Cruz. Yena nomyeni wakhe bacoca izindlu eziliqela Zababuki Zindwendwe abanezindlu zika-Airbnb kumazantsi-ntshona aseFlorida.

Yenze ngokulula ngakumbi imisebenzi eyenziwa xa kucocwa ngokuzilungiselela ukuze uphumelele. UDiana uthembela kwizinto ezahlukahlukeneyo ezifana nezi:

• Imophu esetyenziswa kwizinto ezininzi enemaykrofayibha neentloko zeebrashi ukuze akorobhe aze asuse uthuli kwiikona ekunzima ukufikelela kuzo
• Ipheyile lemophu elinamacala amabini ohlula amanzi anesepha emanzini okutyurusha
• Umatshini wokushayela onemibhobho efakwayo ize ikhutshwe ukuze atshayele iikhaphethi neendawo ekunzima ukufikelela kuzo, ezifana neziporo zeminyango etsalwayo xa ivulwa
• Umbhobho wamanzi waseshaweni ukuze ahlambe isinki, ibhafu okanye ishawa engenawo
• Isixhobo sokukrola iglasi esisetyenziswa kwizinto ezininzi ukuze acoce imiphezulu yezitovu namacango okanye amadonga eeshawa
• Izinto ezixutywayo zokucoca ezingenatyhefu ukuze asuse amabala, ubumdaka besepha namafutha asekhitshini
• Iziponji ezingakrweliyo ukuze asuse amabala amanzi atshele kwizinto zentsimbi
• Iibhola zokomisa ukuze asuse uboya neenwele ezinamathela ezimpahleni
• Ibrashi yokususa uboya enokuphinda isetyenziswe ukuze asuse uboya neenwele zezilwanyana zasekhaya kwifenitshala eyogqunywe ngelaphu

Ukuhlala ulungelelene kungakwenza ulisebenzise kakuhle ixesha lakho. Gcina zonke izinto zakho zokucoca kwindawo enye, njengasebhaskithini okanye ekhabhathini yokugcina izinto etshixwayo yomnikazi wendawo uze umane uzigcwalisa rhoqo.

UDiana uthi, kubalulekile ukwenza izinto ezingaphaya kwezisisiseko ukuba ufuna ukufumana iinkwenkwezi ezintlanu kwiindwendwe. Ucebisa ukuba wenze izinto ngendlela enye uze ube noludwe lwezinto ekufuneka ube uyazenza, ukuze kungabikho nantoni na oyilibalayo.

UDiana usoloko eqala ngokususa izinto ezibhedini namashiti. Uthi: “Kungcono ukuba neeseti zamashiti neetawuli ezongezelelekileyo ukuze ulungiselele ukufika kwezinye iindwendwe kwangosuku olunye. “Iitawuli ezinkulu, ezimfuma-mfuma zithatha ixesha elide ukoma, ibe ziza kukucothisa.”

Uthatha ixesha lakhe esusa ubumdaka, amabala, neenwele kwiindawo eziqhele ukungahoywa ezifana nezi:

• Ngaphantsi kweebhedi. Jonga ngaphantsi kwebhedi nganye uze ususe naluphi na uthuli okanye izinto ezishiyekileyo.
• Ngaphakathi ezidroweni. Vula idrowa nganye uze ususe nayiphi na inkunkuma engaphakathi.
• Kwiminyango yeekhabhathi. Sula imiphambili nemiphetho.
• Kwizixhobo zasendlini. Susa zonke iimvuthuluka, amaqhekeza, okanye izinto ezichitheke kwi-toaster, kumatshini wokwenza ikofu, nakwi-microwave nasefrijini.
• Kwizinto zokuhombisa zangaphakathi. Susa uthuli kuyo yonke indawo, kuquka kwiishelfu, kwii-blinds zeefestile, nakwizityalo zasendlini.
• Kwiindawo ezingaphandle. Tshayela iindawo zokungena neeveranda ukuze ususe ubumdaka, amagqabi neentambo zezigcawu.

Xa ugqibile, hlola umsebenzi wakho. Le nto iquka ukuhlola iimpahla nezitya njengoko uzikhupha ematshinini wokomisa okanye ematshinini wokuhlamba izitya.

Cwangcesa ixesha lokucocisisa qho emva kweenyanga ezimbini okanye ezintathu ukuze ukwazi ukujongana nemisebenzi ongenalo ixesha lokuyihoya phakathi kokuphuma nokungena kweendwendwe.

Abantu bathanda amavumba awahlukeneyo. Nawaphi na amavumba atsho ngamandla angangathandwa zindwendwe. UDiana uthi ukuzama ukogquma amavumba nge-bleach, nge-air fresheners, okanye ngezinye izinto kudla ngokungasebenzi.

UDiana ucebisa ukuba: 

• Uvule iifestile xa usebenza nanini na imozulu ivuma.
• Ushiye ulayite umatshini wokucoca umoya iiyure ezimbini okanye ezintathu ukuze uphelise amavumba atsho ngamandla.
• Utshize amalaphu eesofa, iikhethini neekhaphethi ngespreyi ezisetyenziswa kwizinto ezininzi sokubulala iintsholongwane osixube namanzi.

UDiana uthi, “Ndiye ndizame ukusebenzisa izinto zokucoca ezenziwe ngezityalo, ezingatsho ngamandla kakhulu. Zibiza ngakumbi, kodwa soze uzisole ngokwenza loo nto. Ndinconywa kakhulu ngendlela indawo yam enuka kamnandi ngayo.”

Izinto ezingakumbi ezongezelelekileyo zinokwenza umahluko omkhulu kwiindwendwe. UDiana ucebisa ukuba wenze izinto ezintathu zokugqibela ukuze wenze abantu bayithande indawo yakho kwisihlandlo sokuqala.

• Phinda ugcwalise izinto ezinokusetyenziswa. Ezi zinto ziquka isepha yezitya, isepha yezandla, isepha yokuhlamba umzimba, ishampu ne-conditioner. Ukuba unayo nantoni na enokulahlwa, efana nesiponji sezitya, beka esitsha esingekavulwa.
• Qoqosha izinto zendlu. Qoqosha kakuhle iirimowuthi, imiqamelo emincinci, nezinto ezigcinwe ezidroweni nasezikhabhathini, njengomatshini wokomisa iinwele okanye iimbiza neepani.
• Hombisa ngokugoba izinto. Goba imiphetho yephepha langasese neyamaphepha okosula izandla ukuze idibane, ngendlela ekwenziwa ngayo kwihotele yodidi oluphezulu.

UDiana uthi, “Ndide ndisonge kakuhle neeplastiki zomngqomo wenkunkuma. Iindwendwe ziphawula nezona zinto zincinci—bubungqina bokuba yonke into yenziwa ngumntu wamanyhani.”

Cinga ngokufaka Umbuki Zindwendwe Oncedisayo okanye umntu ococayo ukuze akuncede ufikelele kwizinto ozimisele ukuziphumeza ngokucoca. Uncedo olungakumbi lunokwenza ukulungiselela undwendwe olulandelayo kube lula ibe lunokukunceda ubuke iindwendwe ngendlela efanelwe zinkwenkwezi ezintlanu.

UDiana Cruz nomyeni wakhe abafotwanga.

Inkcazelo ekweli nqaku isenokuba itshintshile emva kokuba lipapashiwe.