Indlela yokuba yiSuperhost

Inkqubo yeeSuperhost yakwa-Airbnb ihoya ababuki zindwendwe bethu abakwinqanaba eliphezulu nabanamava.

Siyakubhiyozela ibe siyakuvuza ukubuka iindwendwe ngendlela esemagqabini ngokufaka ibheji kwindlu yabo, nto leyo enokukunceda kubhukishwe ngakumbi. Iindwendwe zethu ezimalunga ne-59% zithi ukubona ukuba umbuki zindwendwe yiSuperhost kuzenza zizithembe ngakumbi ngomgangatho wendawo yokuhlala, ibe iiSuperhost zenza imali engakumbi nge-60% kunababuki zindwendwe abangezizo.* IiSuperhost ziyakwazi nokunxibelelana Neqela Elinceda Intsapho elikhethekileyo, ukufumana izimemo zamatheko akhethekileyo, iikuphoni nokubekwa kwindawo engcono kwiziphumo zokukhangela.

Ababuki zindwendwe abangaphezu kwe-1,3 miliyoni baye baba ziSuperhost—ibe nawe ungaba yiyo, ngokonyusa izinga lokubhukishwa nangokubuka iindwendwe ngendlela esemagqabini.** Ukulungisa izinto ezimbalwa kwikhalenda yakho, ukuhlaziya indlu yakho nokuhoya ngakumbi indlela onxibelelana ngayo kunokwenza umahluko omkhulu.

I-Superhost kufuneka ibe ngumnikazi wendlu eneakhawunti ekwimeko entle ibe ibizifikelela ezi zinto zine zifunekayo kwiintsuku eziyi-365 ezidlulileyo:

• Ibhukishwe ngokwaneleyo. Ibuke iindwendwe ubuncinane izihlandlo ezibhukishiweyo eziyi-10, okanye izihlandlo ezibhukishiweyo ezipheleleyo zeentsuku eziyi-100 ubuncinane xa kubhukishwe indawo izihlandlo ezintathu.
• Ikuphephe ukurhoxa. Iqhubeke inezinga lokurhoxa elingaphantsi kwe-1%, ngaphandle kwaxa kurhoxiswa ngenxa Yeziganeko Ezinkulu Eziphazamisayo okanye yezinye izizathu ezivakalayo.
• Iziphendule iindwendwe. Igcine izinga lokuphendula lingu-90% okanye lingaphezulu. Umlinganiselo wakho wokuphendula yipesenti yemibuzo yeendwendwe ezintsha oyiphendule kwiiyure eziyi-24.
• Ikukhathalele ukubuka iindwendwe kuqala. Igcine umlinganiselo xa uwonke ungu-4.8 okanye ongaphezulu.

Ukuphendula ngokucacileyo nangokukhawuleza, ukuphepha ukurhoxa nokukhathalela ukubuka iindwendwe kunokukunceda wenze indawo yakho ibe phambili uze wandise ingeniso yakho.

Nanga amacebiso okukunceda ufikelele ezi zinto zifunekayo uze uqalise ukuncedakala ngokuba yiSuperhost.

Ukuvula iintsuku ezingakumbi kwikhalenda yakho kunceda indlu yakho ibonakale ngakumbi kwiziphumo zokukhangela ibe kwandisa amathuba akho okubuka iindwendwe ngokwaneleyo ukuze ufikelele izinto ezifunekayo ukuze ube yiSuperhost.

Yiya kwikhalenda yendlu yakho uze ukhangele iintsuku ezivaliweyo, ezibonakala zingwevu. Vula naziphi na iintsuku ezivaliweyo okwaziyo ukubuka iindwendwe ngazo.

Ukuvumela ukuba kuhlalwe ixesha elifutshane yenye indlela indlu yakho enokuvela ngakumbi ngayo xa kukhangelwa. Ungalungisa ezona ntsuku zakho zohambo zimbalwa ngokosuku lweveki. Ngokomzekelo, ukuba izinga lokufunwa kwendawo zindwendwe liphezulu ngeempela-veki, usenokukhetha ukuvumela ukuba kuhlalwe usuku olunye phakathi evekini kodwa kungekhona xa iindwendwe zibhukisha usuku lwangoLwesihlanu okanye lwangoMgqibelo.

Ukuba bhetyebhetye ngakumbi nokuvumela iindwendwe zibhukishe xa sele kuza kubhaliswa xa kufikwa kukwanceda ekutsaleni abantu abangakumbi ababhukishayo. Khetha elona xesha lincinci ngaphambi kokuba kufikwe ukuba libe kwangolo suku, kuxhomekeka kwixesha olidingayo phakathi kokubhukisha kondwendwe nokufika kwalo.

Ungakwazi nokuvumela izicelo ezifike kwiintsuku ezingaphantsi kweentsuku ofuna ukwazi kwangaphambili ngazo ukuba kuza kufika iindwendwe. Uza kucelwa ukuba uzihlole uze uzivume ezi zicelo.

Izindlu ezinamaxabiso aphantsi kunezinye izindlu ezifanayo ezikufutshane zidla ngokuba phambili kwiziphumo zokukhangela. Cinga ngokulungisa ixabiso lakho losuku xa lithelekiswa nelezindlu okhuphisana nazo ukuze uncedakale ubuke iindwendwe ubuncinane kayi-10.

Ukuze ujonge amaxabiso ezindlu ezifanayo kwingingqi yakho, yiya kwikhalenda yendlu yakho uze ukhethe iintsuku eziyokufika kweziyi-31.

Uza kubona umyinge wexabiso lezindlu ezifana neyakho kwimephu yengingqi yakho. Izinto ezigqibayo ukuba zeziphi izindlu ezifanayo ziquka indawo indlu ekuyo, ubungakanani bayo, izinto ezinokusetyenziswa, imilinganiselo, izimvo, nezinye izindlu iindwendwe ezizijongayo ngoxa zicinga ngeyakho.

Ukuba unexabiso elifanayo suku ngalunye, cinga ngokulungisa amaxabiso akho eveki nawempela-veki ukuze utsale iindwendwe ezingakumbi. Ukutshintsha-tshintsha amaxabiso ngokusekelwe kusuku kunokukunceda wonyuse izinga lokubhukishwa nengeniso yakho.

Ukufaka izaphulelo yenye indlela yokuba phambili kwiindwendwe. Ungenza abahambi abohlukeneyo babe nomdla ngokuba nezi zinto:

• Izaphulelo zeveki nezenyanga. Faka izaphulelo zeveki xa kuza kuhlalwa iintsuku ezisixhenxe okanye ngaphezulu okanye izaphulelo zenyanga xa kuza kuhlalwa iintsuku eziyi-28 okanye ngaphezulu. Le nto inokwandisa umyinge weentsuku eziza kuhlalwa kwizindlu zakho ize kunciphise amathuba okungena nokuphuma kweendwendwe.
• Isaphulelo sababhukishe kwangethuba. Faka isaphulelo xa kubhukishwa kwinyanga eyi-1 ukuya kweziyi-24 ngaphambi kokuba kubhaliswe xa kufikwa, uze wenze ube neendawo ezininzi ezibhukishiweyo ngaphambi kwamaxesha onyaka axakekileyo.

Iindwendwe ziza kubona uphawu olukhethekileyo kwiziphumo zokukhangela nakwiphepha lendlu yakho lokufumana izaphulelo zeveki okanye zenyanga ze-10% okanye ngaphezulu nezaphulelo zababhukishe kwangethuba ze-3% okanye ngaphezulu. Ixabiso lakho elinesaphulelo liza kuvela ecaleni kwexabiso lakho lokuqala, elihlatyiweyo.

Qaphela ukuba isaphulelo sababhukishe kwangethuba asifumaneki xa kuvulwe Indlela Ephucukileyo Yokubeka Ixabiso ibe izaphulelo zexesha eliza kuhlalwa kufuneka zilandele imithetho nemimiselo yasekuhlaleni.

Iindwendwe ziyakuxabisa ukunxibelelana ngokukhawuleza, ngendlela ecacileyo, ibe izinto ezifunekayo kwiiSuperhost zifuna ukuba ababuki zindwendwe babe nomlinganiselo wokuphendula ubuncinane ongu-90%. Ukuseta iimpendulo ezikhawulezayo kukunceda uziphendule ngokulula nangendlela efanelekileyo iindwendwe.

Iimpendulo ezikhawulezayo ziithempleyithi zemiyalezo emifutshane ezithetha ngezihloko ezithile ezidla ngokubuzwa ngababuki zindwendwe. Ungazibhala okanye uzilungise ngaphambi kwexesha ukuze uzithumele xa uncokola nondwendwe.

Ukusebenzela ukuba ufumane izimvo ezineenkwenkwezi ezintlanu kukwathetha ukuqikelela izinto ezifunwa zindwendwe nokwenza konke okusemandleni akho ukuze uzinike izinto ezizifunayo nanini na kunokwenzeka.

• Faka ezincinci ezibonisa ububele. Izinto ezincinci onokuzenza, njengokuzinika ikofu oyithandayo yasekuhlaleni okanye ukuzibhalela umyalezo wokuzamkela ngesandla, kunokunceda kakhulu ekwenzeni iindwendwe zizive zikhethekile.
• Nceda iindwendwe zizive zisekhaya. Zama ukubona indawo yakho nayo yonke into ozinika yona ngendlela eziyibona ngayo. Izinto ezifana nokuvumela ukuba kubhaliselwe ukufika kwangaphambili nokugcina iitawuli zisongiwe ibe zipakishwe kakuhle kunokwenza umahluko ekubeni ufumana umlinganiselo omhle okanye umlinganiselo omhle kakhulu.
• Qhubeka unxibelelana. Zichazele iindwendwe ukuba zinokukufumana okanye zinokufumana umbuki zindwendwe oncedisayo nanini na. Faka izinto eziza kukuchazela xa unemiyalezo esuka kwiindwendwe.

Ukuhlaziya iphepha lendlu yakho rhoqo kungakunceda utsale iindwendwe eziyifaneleyo indawo yakho.

Iifoto ezintle zitsala umdla, zicacisa izinto ezilindelekileyo, zize zenze iindwendwe zizithembe ngakumbi xa zibhukisha indawo yakho. Cinga ngokulungisa iifoto zendlu yakho ukuze ube yiSuperhost.

• Ceba iifoto zakho. Gxininisa ekufumaneni iifoto ezibonisa iinkcukacha ezikhethekileyo zendawo yakho, izinto ezinokusetyenziswa ezithandwayo, nezinto ezinceda ilungele wonke umntu. Fota igumbi ngalinye nendawo enokusetyenziswa zindwendwe ngeendlela ezahlukahlukeneyo.
• Faka iifoto ezilele ngecala nezikumgangatho ophezulu. Iifoto kufuneka ubuncinane zibe zipikseli eziyi-800 eziphindwe ngeepikseli eziyi-1 200. Iifayile ezinkulu zingcono, ukuya kutsho kwii-megabyte eziyi-10.
• Sebenzisa umntu okwaziyo ukufota. Cinga ngokuqesha umfoti ofota kakuhle ukuze akuncede. U-Airbnb unokukudibanisa nomntu ofota kakuhle kwizixeko ezithile emhlabeni wonke.
• Yenza iifoto ezibukisayo. Isixhobo sika-Airbnb silandelelanisa iifoto zakho ezifakiweyo ngokuzenzekelayo ngokwamagumbi ukuze sincede iindwendwe ziyiqonde indlela eme ngayo indawo yakho. Ungazisa kwenye indawo, uzisuse, uze uzifake iifoto, ufake iinkcukacha kwigumbi ngalinye, uze ubhale ingcaciso yefoto nganye.

Into ethethwa yindlu yakho ibaluleke njengendlela ebonakala ngayo. Isihloko sakho, ingcaciso, nezinto ezinokusetyenziswa zenza amathuba angakumbi okutsala iindwendwe ibe zicacisa izinto ezinokuzilindela kwindawo ezihleli kuyo.

• Faka isihloko sendlu esifutshane nesineenkcukacha. Qinisekisa ukuba isihloko sakho siyibonisa ngendlela ekhethekileyo nechanileyo indlu yakho neendawo eziyingqongileyo. Ngokomzekelo isihloko esithi, “Isitudiyo esizolileyo kufuphi eUffizi” sichaza ngamagama nje ambalwa ukuba le ndawo yiflethi okanye yindlu ekwicomplex ezolileyo, esesiphakathini eFlorence, eItali.
• Iingcaciso ezicacileyo nezokwenyani zendlu zidla ngokusebenza kakuhle. Faka iinkcukacha ezinokuthenjwa ezichaza into iindwendwe ezinokulindela ukuyibona, ukuyiva nokuyonwabela kwindawo yakho. Ngokomzekelo, usenokuthi iyadi engasemva ibiyelwe, ibe inendawo eninzi yokudlala abantwana nezilwanyana zasekhaya.
• Faka zonke izinto ezinokusetyenziswa onazo. Cinga ukuba zeziphi izinto ezinokusetyenziswa ezithandwayo onokuzifaka okanye onokuziphucula, njengokutshintsha ibhokisi enesitshixo uze ufake indlela yokungena ngokusebenzisa ifowuni okanye ngokufaka ikhowudi emnyango okanye njengokuphucula i-wifi yakho. Izinto ezinokusetyenziswa eziphambili ezikhangelwa zindwendwe ziquka ukuzingenela, i-wifi, umatshini wokuhlamba impahla, umatshini wokomisa impahla, iTV okanye itshaneli ezibhatalelwayo nendawo yokubraya.***

*Ngokusekelwe kwingeniso ephakathi yeeSuperhost nabangezizo iiSuperhost ukususela ngo-Oktobha 2023 ukuya kutsho ngo-Oktobha 2024.

**Isekelwe kwinkcazelo ka-Airbnb ukususela nge-7 ka-Oktobha 2024.

***Ngokusekelwe kwinkcazelo ka-Airbnb elinganisa ezona zinto zinokusetyenziswa ezikhangelwe kakhulu emhlabeni wonke ukususela nge-1 kaJanuwari ukuya kutsho nge-30 kaJuni 2024.

Amaxabiso akho nezinye iisetingi zilawulwa nguwe ngalo lonke ixesha. Iziphumo zakho zinokwahluka.

Ababuki zindwendwe baye babhatalwa ngokuba kudliwano-ndlebe.

Amacebiso okubuka iindwendwe axhomekeke kumthetho wasekuhlaleni.

Inkcazelo ekweli nqaku isenokuba itshintshile emva kokuba lipapashiwe.