Indlela u-Marie azibuka ngayo iindwendwe
U-Marie ungumbuki zindwendwe e-Paris ukuze afumane imali eyongezelelekileyo
Yintoni eyakwenza wafuna ukwamkela iindwendwe?
Xa intombi yam yayiye kufunda phesheya, ndashiyeka ndedwa kwindlu enkulu eyayineendleko ezininzi. Ndacinga ngokufuduka, kodwa ekugqibeleni, ndagqiba kwelokuba ndifake igumbi lentombi yam kwi-Airbnb ukuze ndibone ukuba kuza kwenzeka ntoni.
Ngaba ikhona into ongamcebisa ngayo umntu ocinga ngokuba ngumbuki zindwendwe?
Kufuneka ukuthande ukwamkela iindwendwe, ukuthande ukwabelana nabanye, yaye uhlale ukhona ukuze uqiniseke ukuba iindwendwe zihleli kakuhle kwaye azidingi nto. Ngaphezu kwako konke, kufuneka ukwazi ukuzinika amacebiso eziwadingayo okanye anokwenza uhambo lwazo lube ngcono. Yiloo nto eyenza ukuba yahluke kwihotele. Le nto imele ibe yeyona iphambili kunokwenza nje imali.
Ulungiselela njani ukuze uqiniseke ukuba yonke into ihamba kakuhle xa iindwendwe zifika?
Kwiintsuku eziliqela ngaphambi kokufika kwazo, ndizithumelela iinkcukacha ngokufika kwazo nendlela yokuya endlwini ukusuka epleyinini okanye etreyinini. Okulandelayo, ndijonga ukuba igumbi lokulala kunye negumbi lokuhlambela licocekile na kwaye linazo zonke izinto ezidingekayo (iitawuli, i-shower gel, ishampu, nezinye izinto.). Emva koko ndizibonisa ikhowudi ye-WiFi kwaye ndishiya iimephu ze-Paris kunye nezetreyini, kunye nezinye iincwadana.
Yintoni oyithanda kakhulu ngokuba ngumbuki zindwendwe?
Kukudibana kunye nokuthetha neendwendwe! Kukuhoya iimfuno zazo ukuze zimke zonwabile kwaye zineenkumbulo ezintle zohambo lwazo.
Ukuba ngumbuki zindwendwe kuyitshintshe njani indlela ophatha ngayo umzi wakho?
Ndiyithanda kakhulu into yokuba nekhaya elicocekileyo nelilungele ukwamkela iindwendwe. Ukuba ngumbuki zindwendwe kundinike ithuba lokulungisa indlu yam ukuze ihlale ibukeka.
Yeyiphi eyona nto imangalisayo oyifumanisileyo njengombuki zindwendwe we-Airbnb?
Ekufikeni kwam ekhaya ngenye imini, ndafika kukho undwendwe lwam lwangobo busuku. Elo nenekazi lothuka lakundibona laza labuza ukuba ndingubani. Ndalicela ukuba liwuphinde umbuzo kuba ndandingaqinisekanga ukuba ndilive kakuhle. Ndalixelela ukuba ndingumbuki zindwendwe. Labuza: "Uza kuba lapha yonke imihla?" Ndathi, "E-e, ewe—ndihlala apha." Lalicinga ukuba libhukishe yonke indlu. Ekugqibeleni, sayihleka kakhulu, kwaye saba nethuba elimnandi.