Ubuso bukaPatricia bugcwala luvuyo njengoko ebalisa ngobomi bakhe esengumntwana, edlala nabanye abantwana kwiinduli ezijikeleze i-Naucalpan de Juarez, indawo enamahlathi kwintshona yeSixeko sase-Mexico, nenemiqolomba apha naphaya, imisinga nemifula enzulu, kwanezilwanyana ezininzi zasendle. Ngoku, uvuyela ukuba ngumkhenkethisi nombuki zindwendwe kummandla wemvelo wase-Naucalpan obusagciniweyo kuwo ubugcisa nenkcubeko yase-Mexico. UPatricia uthi: “Ndiyathanda ukubonisa abantu le ndawo kuba ndiyazingca ngayo.” “Andifuni kuyigcinela mna kuphela, okanye abamelwane bam. Ndicinga ukuba ifanele ibonwe ize ibukwe.” Ukwabelana nabanye ngendawo oyithandayo emhlabeni kuko okumanyanisa ababuki zindwendwe abaninzi be-Airbnb. Kodwa bambalwa abakhe babelana ngendawo entle njenge-Quetzalcoatl's Nest kaPatricia. Ithiywe ngegama lothixo ohlonitshwayo ngama-Aztec oyintaka kwelinye icala aze abe yinyoka kwelinye; iyipaki entle enezindlu ezakhiwe ngaphakathi kwipomakazi lesakhiwo esihle nesihonjisiweyo, esinemifanekiso eqaqambileyo ngaphakathi ize iphumele nangaphandle. Sisakhiwo esihle ngokungathethekiyo esayilwa nguJavier Senosiain, igcisa lokwakha lase-Mexico elaba lelokuqala ukwenza olu hlobo “ lwezakhiwo zobugcisa.” Ikhaya likaPatricia lelinye lamakhaya ayi-10 akwesi sakhiwo kwaye lilo kuphela elifumanekayo kwi-Airbnb. Yiflethi evulekileyo enamagumbi okulala ayi-5 aneefestile ezirawundi, iisilingi ezigobileyo, nezinye izinto ezikhethekileyo zobugcisa ezakhiwe ngaphakathi esiswini sesi sakhiwo simile okwenyoka. Ukuhonjiswa kwesi sakhiwo ngeendlela zale mihla kwenza uzive ukhululekile kuso njengaxa ukwizakhiwo ezikufutshane naso.

Into eyakhuthaza uPatricia ukuba abe ngumbuki zindwendwe ngokusisigxina kukubona omnye woodadewabo, owayefake indlu yakhe kwi-Airbnb. Kwaye loo nto yahambelana nomnqweno kaPatricia wokushiya isiphithiphithi seSixeko sase-Mexico aye kwindawo eluhlaza nenoxolo. Ukususela ngo-2015, uye waqhubeka ngokuzimisela engapheli mandla. UPatricia udla ngokuzamkela ngokwakhe iindwendwe aze azingenise endlwini kwindawo evulekileyo esecaleni kwesisu sale nyoka. Uva kamnandi xa iindwendwe zikhuza ngeelwimi ezahlukahlukeneyo njengoko zihamba-hamba kule ndawo, zisithi—“wow,” “ooh,” “ooh la la.” Uthi: “Nangona zizibonile iifoto, bezingalindelanga ukuba inkulu kangaka kwaye intle kangaka le ndawo, izolile kwaye iseluxolweni.” UPatricia uyathanda ukuzikhenkethisa kwesi sakhiwo iindwendwe zakhe. Ibe kwezininzi, le iba yeyona nto ibalulekileyo ngokuhlala kwazo kwi-Quetzalcoatl’s Nest. Olu khenketho lunokuthatha iiyure ezi-3 ukuya kwezi-4 ukuba iindwendwe zilulungele. Ininzi into enokubukwa kule ndawo eziihektare eziyi-40 enomhlaba olungisiweyo nomnye oshiywe ukwimeko yawo yemvelo. Kwaye uPatricia akangxami, uthi chu ngabom. Ukhomba kumlomo wesi sakhiwo esimile okwenyoka ongumqolomba wemvelo, akhuthaze iindwendwe ukuba ziqwalasele iintyatyambo nemithi eyahlukahlukeneyo, ziqaphele imibala eqaqambileyo yamagqabi, izandi zehlathi, zize zichukumise izinto ezahlukahlukeneyo zemvelo nezenziwe ngabantu. Uthi: “Ngamanye amaxesha ndiyazimema ukuba zihambe zinganxibanga zihlangu engceni ukuze ziyiv' emzimbeni le ndawo.”

Kuhambo ngalunye, uthetha ngama-Huichol, abantu bomthonyama abavela kwiintaba zase-Mexico, abadume ngezinto zabo zobugcisa eziyimabala-bala. “Ama-Huichol abe negalelo elikhulu ekwenziweni kwentloko yale nyoka,” utsho njalo uPatricia. Imihombiso erawundi neyimibala-bala eyenziwe ngodongwe nesentlokweni, emehlweni, nasemazinyweni, kunye nobunye ubuhle obumangalisayo besi sakhiwo se-Senosiain, buphenjelelwe bubugcisa bama-Huichol. UPatricia wongeza athi: “Enye yezinto esifuna ukuzifaka kule ndawo ngumbala waseMexico.” Kwakhona uPatricia ufundisa iindwendwe ngezityalo zokunyanga ezikhoyo kule ndawo kunye nokusetyenziswa kwazo ngama-Huichol nabanye abantu. Ukuba ubona ngathi iindwendwe zingayivuyela loo nto, uye azimeme ukuba zimjoyine xa ecamngca emva kokhenketho. Ekugqibeleni, into emqhubayo ngumnqweno wokwabelana ngobugcisa, inkcubeko nobuhle bemvelo base-Mexico, kuquka izinto ezinokonwatyelwa kunye nokudibana kwabantu. Uthi: “Ndiqaphele ukuba nokuba iindwendwe zam zisuka eTshayina, e-Mexico, eSpeyin, eOstreliya okanye naphi na, sonke sineemvakalelo, sonke siyathanda, sonke singabantu.” Wongeza athi, Abantu basenokubonakala bohlukile, “kodwa ngaphakathi, sifana kakhulu.” Unethemba lokuba ngokubuka kwazo indalo nenkcubeko yase-Mexico, nangokuhlala kwazo ngaphakathi kwi-Netetzalcoatl's Nest, iindwendwe zakhe ziya kumka zitshintshile. Uthi: “Eyona nto ndiyithandayo ngokwamkela iindwendwe nokunxibelelana neendwendwe zam kukuba azikhenkethi nje kuphela, kodwa zinento ezinokuyonwabela, into ezinokuyonwabela ebaluleke kakhulu kuzo.” “Ukuya eholideyini kufana nokuthatha ikhefu, kwaye ndithanda ukwabelana nazo ngelo khefu, ndizincede zizifune ukuba zingoobani kwaye yintoni kanye kanye eziyifunayo.”