Indlela yokulungisa iifoto zendlu zokubuka ikhaya

Khetha, ubuke, ubhukishe. Yile nto ufuna umhambi ngamnye ayenze xa indlu yakho ivela kwiziphumo zakhe zokukhangela, akunjalo? Amaxesha amaninzi ungafaka isandla kwisigqibo sakhe sokuhlala kwakho—okanye sokuqhubeka ekhangela—ngeefoto ozifakayo zendawo yakho.

Ngaphezulu kokuchitha intwana yexesha ufota iifoto ezintle zendlu uze ukhethe ezona zintle onokuzifaka, yintoni enye onokuyenza ukuze utsale iindwendwe? Zama ukutshintsha igalari yeefoto zakho ibe kukubuka ikhaya kwi-intanethi.

Igalari yeefoto zakho iquka zonke iifoto ozifakileyo kwindlu yakho. Kwizikrini ezincinci, ezifana nee-smartphones, iindwendwe zinokubuka igalari yeefoto zakho ngokucofa ifoto yakho ekwiphepha lokuqala, evela yodwa phezulu kwiphepha lendlu yakho.

Kwizikrini ezinkulu, ezifana nee-tablet nee-laptop, kubakho iifoto eziyi-5 endaweni yefoto enye ibe loo nto yenza iindwendwe zibone ngcono ukuba yintoni eyenza indawo yakho yenze umdla. Zinokukhetha neyiphi na kwezo foto ukuba zifuna ukubuka yonke igalari yakho, evezwa ibe nkulu kwaye ifoto ibe sezantsi kwenye.

Ungazilungisa ezi foto zivezwa zibe nkulu ngokwegumbi ngalinye elikwindlu yakho. Le nto yijonge ngokungathi iindwendwe uzibukisa ikhaya kwi-intanethi— ithuba lokubuka ikona nganye yendawo yakho ngaphambi kokubhukisha.

Qala ngokuqinisekisa ukuba ufaka iifoto ezicacileyo nezikhanya kakuhle zegumbi ngalinye elikwindawo yakho elinokusetyenziswa zindwendwe. ISuperhost uSarah waseSayulita, eMexico, ucebisa ukuquka “ubuncinane iifoto eziyi-2 zegumbi ngalinye lokulala, kumacala ahlukeneyo ukuze iindwendwe zibone ukuba kukho iwodrophu, idesika okanye nantoni na ekhoyo kulo.”

Okulandelayo, ukuba ubungekayenzi loo nto, faka iifoto ezimbalwa zezinto ezinokusetyenziswa ezikhethekileyo okanye ezinye iinkcukacha. Zinokuquka ikhitshi elinazo zonke izinto, iofisi enomnyango okanye igumbi lokudlala abantwana elinezinto.

Iifoto zezinto zokunceda abaneziphene, njengendawo yokungena engenazitepsi okanye iminyango ebanzi, zinokuba nenkcazelo ebalulekileyo nazo. Iindwendwe zidla ngokufuna ukubona ukuba yintoni eyenza indawo yakho ikhetheke—nokuba kutheni iyindawo ekumnandi ukuhlala kuyo.

Xa wanelisekile ngegalari yeefoto zakho, ungayenza ibe kukubuka ikhaya kwi-intanethi. Lungisa indlu yakho ngala manyathelo mabini alula:

1. Kwiinkcukacha zendlu, khetha indawo ethi Indlu namagumbi, emva koko uhle uye ezantsi ukuze ulungise indawo ethi Amagumbi.
2. Kuvela uludwe lwamagumbi anokusetyenziswa zindwendwe zakho. (Ukuze ufake okanye ususe amagumbi, yiya kwindawo ethi Lungisa amagumbi.) Khetha igumbi kuludwe, khetha iqhosha elithi Faka iifoto, uze ukhethe iifoto zeli gumbi ezikwigalari yeefoto zakho. Yenza into efanayo kwigumbi ngalinye.

Ukulungisa ifoto nganye kwigalari yeefoto zakho ngokwegumbi elithile kunceda wenze ukubuka ikhaya kubangele umdla kuze kube lula ukuba iindwendwe zikuqonde. Akukho ngxaki ngokuba neefoto ezisecaleni, eziza kufakwa kwicandelo leeFoto Ezongezelelekileyo ngokuzenzekelayo ekupheleni kokubuka ikhaya—qinisekisa nje ukuba ezi foto bekungafanelanga zikunye nezinye ukuze kungabikho ukubhideka.

Emva kokuba ulungise indlu yakho, igalari yakho ilandelelaniswa ngokwamagumbi. Iindwendwe zifumana amagqabantshintshi ngendlu azivumela zibuke igumbi ngalinye okanye zibuke ikhaya lonke. Ngokuqhelekileyo ukubuka ikhaya kuqala kwigumbi lokuhlala, kuye ekhitshini, emagumbini okulala, emagumbini okuhlambela, kwiindawo eziphandle, nakwamanye amagumbi onawo kwindlu yakho.

Kubalulekile ukuba uphawule ukuba ukulandelelanisa igalari yeefoto zakho ngokwamagumbi akuzukuchaphazela ifoto ekwiphepha lokuqala okanye iifoto eziyi-5 eziphezulu kwindlu yakho. Ukwenza le nto yenye nje indlela onokunceda iindwendwe ezinomdla zifumane inkcazelo eziyifunayo nokuzithemba ukuze zibhukishe indawo yakho.