Isikhokelo sabantu abaqalayo sendlela yokubuka iindwendwe ngendlela engonakalisi indalo

Ukuba Ngumbuki Zindwendwe okhusela indalo akulungeli iplanethi kuphela, kulungela neshishini lakho lokubuka iindwendwe. Ngo-2019, inani leendawo zokuhlala ezingayonakalisiyo indalo linyuke nge-141 pesenti* kunakunyaka ophelileyo.

Ukuze sikuncede ube Ngumbuki Zindwendwe okhusela indalo ngakumbi, sisebenze ngokusondeleyo Nenkqubo Yendalo Yezizwe Ezimanyeneyo, igunya elikhokelayo lokukhusela indalo emhlabeni wonke Kwizizwe Ezimanyeneyo, kunye neWorld Wildlife Fund, umbutho okhokelayo emhlabeni ngokukhusela indalo, ukuze sifumane amacebiso eenkcutshe. Siqokelele namacebiso avela Kubabuki Zindwendwe emhlabeni wonke abathathe amanyathelo alula kodwa anegalelo ukuze benze umahluko.

Qhubeka ufunda ukuze ufumane indlela yokwenza iindwendwe zakho zihlale ngendlela engonakalisi indalo.

Ukwenza indawo yakho ingasebenzisi mbane kakhulu kunokunciphisa izinto ozisebenzisayo, kunciphise iindleko zakho, kuze kunciphise ukungcoliswa komoya. Nanga amacebiso okonga umbane:

• Khumbuza iindwendwe ukuba zikhuphe izixhobo xa zingasetyenziswa: Ukuya kutsho kwi-50%** yombane osetyenziswa zifowuni uvela kwiitshaja ezifakwe embaneni xa zingasetyenziswa.
• Lungisa isixhobo sakho sokufudumeza amanzi:Ngoxa ubushushu obuqhelekileyo besixhobo sokufudumeza amanzi buyi-140 degrees Fahrenheit (60 degrees Celsius), ukubunciphisa bube yi-120-130 degrees Fahrenheit (48-54 degrees Celsius) kunokunceda wonge umbane.
• Hlola iibhalbhu zakho:Ukusebenzisa amandla ombane amancinci kunokwenza kubekho ubushushu obuncinci kuze kunciphise ukusetyenziswa kombane ekuhambeni kwexesha. Iibhalbhu ezisebenzisa umbane kancinci, njengeCFL neLED, nazo zisebenzisa umbane omncinci kwaye zihlala ixesha elide** kunezinye iintlobo ze-incandescent.
• Yenza indawo yakho ingangeni moya: Faka izinto zokuvala umoya emnyango uze wogqume imigubasi yeefestile ukuze wonge imali yokufudumeza nokupholisa indlu.
• Thenga ii-themostats eziphucukileyo ezizilawulayo: Ii-themostats ezisebenzisa i-wifi zinokukunceda ulawule ubushushu ngokusekelwe ekufikeni nasekuhambeni kweendwendwe.
• Hlola izixhobo zakho zombane: Xa kufike ixesha lokuthenga izixhobo zombane ezitsha, khetha ezo zinezinga eliphezulu lokonga umbane.

Izinto zokucoca ezinokuphinda zisetyenziswe neemveliso ezinokugcwaliswa kwakhona zilithuba elihle ebantwini abaninzi lokunciphisa ukusetyenziswa kwezinto ezonakalisa indalo. Cinga ngala macebiso okuba ngumntu okhusela indalo ngakumbi:

• Susa izinto zokucoca ezisetyenziswa kube kanye: ISuperhost uAnna wasePembrokeshire, eWales, uthenga iziponji ezihlanjwayo nezisebenziseka ngokuphindaphindiweyo namalaphu okucoca ekhitshini endaweni yamaphepha okusula anokulahlwa.
• Sebenzisa iimveliso zephepha elenziwe ngokutsha: Kuzo zonke iimveliso zephepha onokuzinika iindwendwe, njengeetishu zobuso okanye iphepha langasese, khetha iphepha elenziwe ngokutsha ukuze ungalonakalisi indalo.
• Nciphisa ukusetyenziswa kweekhemikhali ezinobungozi: Thenga isepha yezitya, isepha yokuhlamba impahla, nezinto zokuhlamba ezingenabungozi okanye ezinobungozi obuncinci, ezenziwe ngezinto zemvelo, okanye ezinokuboliswa zintsholongwane. EBordeaux, eFransi, iSuperhost uPascale uthenga izinto zokuhlamba nezokuthambisa ezenziwe ngezinto zemvelo kwiivenkile zasekuhlaleni.
• Sebenzisa amalaphu enziwe ngezinto zemvelo: Xa kufike ixesha lokutshintsha amashiti neetawuli, ukukhetha amalaphu enziwe ngezinto zemvelo kunokukunceda uphephe izibulala-zinambuzane, amayeza okubulala izinambuzane, nezinye izinto ezinobungozi ebantwini nakwiinkqubo zemvelo.

Kuba amanzi acocekileyo eyinto enqabileyo, kubalulekile ukuba uqaphele ukuba wena neendwendwe zakho nisebenzisa amanzi angakanani, ingakumbi njengoko ingxaki yemozulu ibangela imbalela engakumbi. Nazi ezinye iindlela ezincedayo zokonga amanzi:

• Bhalela iindwendwe izikhumbuzo: Ukunciphisa ixesha ohlamba ngalo ngomzuzu kungonga ngaphezu kwegaloni** yamanzi ngomzuzu ngamnye. ISuperhost uAntonella oseMilan, eItali, ubeka imiyalezo kufutshane neetephu ukuze akhuthaze iindwendwe ukuba zivale amanzi xa zihlamba amazinyo. Ungakhuthaza iindwendwe ukuba zihlambe eshaweni ixesha elifutshane.
• Jonga ukuba akukho manzi avuzayo na: Ukuhlola qho iindawo ezijikeleze izindlu zangasese, iisinki, iibhafu, nezixhobo ezisebenzisa amanzi kunokukunceda ubhaqe amanzi avuzayo. Imitha yamanzi ephucukileyo inokulandelela ukuba usebenzisa amanzi angakanani ize ikuchazele ukuba kukho into engaqhelekanga—ngokomzekelo, ukuba ulibele ukuvala itephu ekhitshini okanye kukho into evuzayo kumatshini wokuhlamba izitya.
• Sebenzisa iisetingi nezixhobo ezisebenzisa amanzi ngendlela efanelekileyo: Oomatshini bokuhlamba impahla noomatshini bokuhlamba izitya basebenzisa amanzi amaninzi. Ukuba indawo yakho inabo, khuthaza iindwendwe ukuba zisebenzise iisetingi zokuhlamba ngokukhawuleza okanye ezokonga amanzi. Kwaye xa kufike ixesha lokutshintsha umatshini, khetha ongasebenzisi umbane omninzi nowasebenzisa kancinci amanzi.
• Faka izixhobo ezicothayo xa zikhupha amanzi: Ungenza umahluko ngokufaka iitephu ezicothayo xa zikhupha amanzi okanye iithoyilethi ezisebenzisa amanzi ambalwa okanye ezineendawo zokuflasha ezimbini. ETasmania, eOstreliya, iSuperhost uMerrydith unentloko yeshawa ekhethekileyo enciphisa amanzi aphumayo ngoxa amanzi evakala ephuma ngamandla.

*Ngokusekelwe kwinkcazelo yangaphakathi ka-Airbnb yonyaka nonyaka yokwanda kwezinga lokufika kweendwendwe kwizinto ezinokubhukishwa kuquka namagama athile (ezingayonakalisiyo indalo, eziphatha kakuhle indalo, njl.) kwizihloko zezinto ezinokubhukishwa nakwiingcaciso ukususela ngoAgasti 2018 ukuya kuAgasti 2019

**Ivela kwinqaku leWorld Wildlife Fund lamanyathelo ayi-60 okunceda iPlanethi, elipapashwe nge-5 kaMatshi 2021

Inkcazelo ekweli nqaku isenokuba itshintshile emva kokuba lipapashiwe