Iindlela ezintandathu zokulungiselela ixesha lonyaka apho izinga lokufunwa kwendawo liphantsi

Ngaba ulilungele ixesha lonyaka indawo engafunwa kakhulu ngalo kwingingqi yakho? Nazi iindlela ezintandathu onokusebenzisa ngazo izixhobo zokubuka iindwendwe zakwa-Airbnb ukuze zikuncede ulawule ukubhukisha njengoko izinga lokuhamba kweendwendwe lisehla. Cinga ngendlela onokuncedakala ngayo ngendlela nganye ukuze wenze isigqibo ngento elungele ishishini lakho lokubuka iindwendwe.

Ukunciphisa elona xesha lakho lifutshane leentsuku zohambo kunokutsala iindwendwe ezifuna ukubhukisha ixesha elifutshane kuze kuncede ekugcwaliseni izikhewu kwikhalenda yakho xa abantu bengahambi kangako.

Ungakhetha ukulungisa ezona ntsuku zakho zohambo zimbalwa ngokosuku lweveki. Ngokomzekelo, ukuba izinga lokufunwa kwendawo ziindwendwe liphezulu ngeempela-veki, usenokukhetha ukuvumela ukuba kuhlalwe usuku olunye phakathi evekini kodwa kungekhona xa iindwendwe zibhukisha usuku lwangoLwesihlanu okanye lwangoMgqibelo.

Ukuze wehlise ezona ntsuku zakho zohambo zimbalwa:

• Yiya kwithebhu ethi Ukufumaneka kwikhalenda yendlu yakho.
• Phantsi kwendawo ethi Inani leentsuku zohambo, cofa kwindawo ethi Ezona ntsuku zimbalwa.
• Lungisa ezona ntsuku zimbalwa zohambo zibe linani leentsuku ezikusebenzelayo.

UFelicity, ilungu Lebhodi Yabacebisi Yababuki Zindwendwe noyiSuperhost eNew South Wales, eOstreliya uthi, “Ukuba ndinesithuba seentsuku ezisibhozo, amathuba okubhukishwa iintsuku ezisixhenxe mancinane. Ukuba ndiyazinciphisa ezona ntsuku zimbalwa zinokuhlalwa ngelo xesha, into enokwenzeka kukuba ndiza kutsala iindwendwe ezingakumbi.”

Cinga ngokuvumela iindwendwe ukuba zibhukishe xa sele kuza kubhaliswa xa kufikwa ukuze uncedakale utsale abantu abangakumbi ukuba babhukishe ngexesha lonyaka apho izinga lokubhukisha liphantsi. Ungakhetha elona xesha lincinci ngaphambi kokuba kufikwe ukuba libe kwangolo suku, kuxhomekeka kwixesha olidingayo phakathi kokubhukisha kondwendwe nokufika kwalo.

Ukuze utshintshe elona xesha lakho lincinci lingenakubhukishwa:

• Yiya kwithebhu ethi Ukufumaneka kwikhalenda yendlu yakho.
• Vula iintsuku ezingenakubhukishwa.
• Khetha inani leentsuku olithandayo.

Ungakwazi nokuvumela izicelo ezifike kwiintsuku ezingaphantsi kweentsuku ofuna ukwazi kwangaphambili ngazo ukuba kuza kufika iindwendwe. Uza kucelwa ukuba uzihlole uze uzivume ezi zicelo.

UKaren, iSuperhost yaseNelson, eBritish Columbia uthi, “Lithuba elihle kakhulu lokubalasela kwezinye izindlu ezisenokuba aziyivumeli le nto. Kuyakwazeka nokuzingenela, ibe ndisebenzisa imiyalezo enexesha lokuthunyelwa ukuze ndithumelele abanye abantu indlela yokuya. Loo nto indenza ndikwazi ukwamkela iindwendwe ezibhukishe kufuphi nexesha lokubhalisa xa kufikwa.”

Ukunciphisa ixabiso lakho losuku njengoko usuku lokungena lusondela lunokukunceda utsale abantu ababhukisha ngomzuzu wokugqibela. Cinga ngokufaka isaphulelo xa kubhukishwa kusuku oluyi-1 ukuya kutsho kwiintsuku eziyi-28 ngaphambi kokuba kubhaliswe xa kufikwa ukuze ugcwalise ikhalenda yakho uze unyuse ingeniso yakho.

Xa kukho izaphulelo ze-10% okanye ezingaphezulu kwixabiso lakho eliphakathi leentsuku eziyi-60, iindwendwe ziza kubona uphawu olukhethekileyo kwiphepha lendlu yakho nakwiziphumo zokukhangela. Ixabiso lakho elinesaphulelo liza kuvela ecaleni kwelokuqala, elihlatyiweyo.

Ukuze ufake isaphulelo esikhutshwa xa sele kuza kungenwa:

• Yiya kwithebhu ethi Amaxabiso kwikhalenda yendlu yakho.
• Phantsi kwendawo ethi Izaphulelo ezingakumbi, vula Izaphulelo zomzuzu wokugqibela.
• Faka inani leentsuku ngaphambi kokuba kufikwe, eziphakathi ko-1 no-28.
• Faka ipesenti yesaphulelo ongathanda ukuyifaka.

UJimmy, iSuperhost yasePalm Springs, eKhalifoniya uthi, “Ubuncinane, ndiziva ndikhululekile ukunciphisa nge-15%. “Ndinalo elona xabiso eliphantsi, ngoko andisoze ndibe ngaphantsi kwalo. Xa kuza kuhlalwa ngale mpela-veki, ndiye ndikulungele ukuya kwelo xabiso liphantsi ukuze ndikwazi ukubhukishwa.”

Izaphulelo zaxa kuza kuhlalwa ixesha elide zinokunceda ekuphuculeni indawo ovela kuyo xa kukhangelwa izindlu, zigcwalise izikhewu kwikhalenda yakho, zize zinciphise amathuba okungena nokuphuma kweendwendwe. Cinga ngokuba nezaphulelo zeveki xa kuza kuhlalwa iintsuku ezisixhenxe okanye ngaphezulu nezaphulelo zenyanga xa kuza kuhlalwa iintsuku eziyi-28 okanye ngaphezulu.

Iindwendwe ziza kubona uphawu olukhethekileyo kwiphepha lendlu yakho nakwiziphumo zokukhangela zezaphulelo zeveki okanye zenyanga ze-10% nangaphezulu. Zonke izaphulelo zeentsuku eziza kuhlalwa nazo ziyabalaseliswa ecaleni kwexabiso lakho lakuqala kwindlela ixabiso elahlulahlulwe ngayo.

Ukuze ufake isaphulelo seveki okanye senyanga:

• Qinisekisa ukuba ezona ntsuku zimbalwa nezona zininzi zinokuhlalwa kwakho zihambisana nemithetho nemimiselo yasekuhlaleni.
• Ukuba unganikezela ngeendawo zokuhlala iveki okanye ngeendawo zokuhlala iintsuku ezingangenyanga, yiya kwithebhu ethi Amaxabiso kwikhalenda yendlu yakho.
• Ngaphantsi kwezaphulelo zeveki okanye zenyanga, seta ipesenti yesaphulelo uze ucofe kwindawo ethi Gcina.

UOmar, iSuperhost yaseMexico City uthi, “Ukunikezela ngezaphulelo zeveki okanye zenyanga ngokuqinisekileyo kuza kwenza indlu yakho ibukwe ngabantu abangakumbi. Ndiye ndaqaphela ukuba abahambi abangakumbi, ingakumbi abathanda ukuhamba bencedwa yitekhnoloji, bayeza ukuze bahlale ixesha elide.”

Ukuba nesaphulelo esifumaneka kube kanye ngexesha lonyaka apho izinga lokufunwa kwendawo liphantsi yindlela entle yokubalasela xa kukhangelwa izindlu uze wenze kubhukishwe ngakumbi. Xa unikezela ngezaphulelo ze-15% okanye ngaphezulu, iindwendwe ziza kubona uphawu olukhethekileyo kwiphepha lendlu yakho nakwiziphumo zokukhangela.

Ukuze ufake isaphulelo esifumaneka kube kanye esikhethekileyo:

• Yiya kwithebhu ethi Amaxabiso kwikhalenda yendlu yakho.
• Khetha iintsuku kwikhalenda.
• Beka ipesenti yesaphulelo sakho.

Isaphulelo esikhethekileyo sisenokungafumaneki qho kwindlu yakho. Izinto ezifunekayo ziquka ukuba indlu yakho imele ubuncinane ibhukishwe kathathu, ibe ubuncinane kube kanye kunyaka odlulileyo, kwaye iintsuku ozikhethayo kufuneka zibe zifumaneka ubuncinane kangangeentsuku eziyi-28.

UDaniel, ilungu Lebhodi Yabacebisi Yababuki Zindwendwe eTenerife eCanary Islands, uthi, “Izaphulelo ezifumaneka kube kanye zindenza ndikwazi ukubeka ixabiso leenyanga ezimbalwa ezizayo ndize ndikwazi ukukhetha isaphulelo ukuba khange kubekho mntu unomdla ngelo xesha.” “Zezinye zezixhobo endizithandayo, kuba ndiyathanda ukwazi izinga lokufunwa kwendawo ukuze ndenze ngendlela efanelekileyo.”

Ukuthelekisa amaxabiso ezindlu ezifana neyakho kwingingqi yakho kunokukunceda ubeke ixabiso elikhuphisana kakuhle namanye uze utsale iindwendwe ezingakumbi ukuba zibhukishe njengoko izinga lohambo lisehla. Ukuba ixabiso lakho liphezulu kunezindlu ezifana neyakho ezikufutshane, usenokulinciphisa ukuze utsale iindwendwe ezingakumbi uze uphucule indawo ovela kuyo xa kukhangelwa.

Ukuba unexabiso elifanayo suku ngalunye, cinga ngokufaka amaxabiso eveki nawempela-veki. Ukutshintsha-tshintsha amaxabiso akho ngokusekelwe kusuku kunokukunceda wonyuse izinga lokubhukishwa.

Ukuze uthelekise izindlu ezifanayo:

• Yiya kwithebhu ethi Amaxabiso kwikhalenda yendlu yakho.
• Khetha iintsuku eziyokufika kweziyi-31.
• Cofa kwindawo ethi Thelekisa izindlu ezifanayo.

Uza kubona umyinge wexabiso lezindlu ezifana neyakho ezikufuphi kwimephu yengingqi yakho. Amaqhosha akwimephu akuvumela ukuba ujonge izindlu ezibhukishiweyo okanye ezingabhukishwanga. Izinto ezigqibayo ukuba zeziphi izindlu ezifanayo ziquka indawo indlu ekuyo, ubungakanani bayo, izinto ezinokusetyenziswa, imilinganiselo, izimvo, nezinye izindlu iindwendwe ezizijongayo ngoxa zicinga ngeyakho.

UKatie Kay, ilungu Lebhodi Yabacebisi Yababuki Zindwendwe noyiSuperhost eLake Arrowhead, eKhalifoniya uthi, “Ndiye ndijonge izindlu ezifana nezam ukuze ndiqiniseke ukuba ndinexabiso elikhuphisana kakuhle. Kubalulekile ukuba bhetyebhetye ngamaxesha apho izinga lokufunwa kwendawo liphantsi ukuba ufuna nyhani ukufaka abantu kwindlu yakho.”

Amaxabiso akho nezinye iisetingi zilawulwa nguwe ngalo lonke ixesha. Iziphumo zakho zinokwahluka. 

Ababuki zindwendwe baye babhatalwa ngokuba kudliwano-ndlebe.

Inkcazelo ekweli nqaku isenokuba itshintshile emva kokuba lipapashiwe.