Yenza iprofayile yakho yombuki zindwendwe ikusebenzele
Iindwendwe zisixelele ukuba zifuna ukwazi abantu abaza kuhlala nabo ngaphambi kokuba zibhukishe igumbi. Iprofayile yakho yombuki zindwendwe inokukunceda uzazise uze wenze iindwendwe zazi izinto ezinokuzilindela.
Yintoni iprofayile yombuki zindwendwe?
Iprofayile yakho yombuki zindwendwe yindlela undwendwe oluyibona ngayo iprofayile yakho ka-Airbnb. Igama lakho, iminyaka ubuka iindwendwe, umlinganiselo weenkwenkwezi, nenani lezimvo zeendwendwe zivela ngentla. Loo ndawo ilandelwa zizo naziphi na iinkcukacha zakho ongathanda ukuzifaka, njengomsebenzi wakho, izinto othanda ukuzenza, iilwimi, izinto ezinika umdla, igama lezilwanyana zasekhaya, nento eyenza kukhetheke ukuhlala kwindawo yakho.
Iindwendwe zinokubona iinxalenye zeprofayile yakho yombuki zindwendwe kwiziphumo zokukhangela amagumbi. Zingacofa ifoto yakho ukuze zibone iprofayile yakho epheleleyo. Iindwendwe zinokufikelela kwiprofayile yakho nakwinto yakho enokubhukishwa.
Zama la macebiso ukuze ufote ifoto eza kuba nomtsalane xa iqala ukubonwa.
Iprofayile yam yombuki zindwendwe izinceda njani iindwendwe?
Iprofayile yakho yombuki zindwendwe ikunceda uqalise ukwenza ubuhlobo neendwendwe. Ukwazi ukuba ninomdla kwizinto ezifanayo, kumsebenzi okanye kumculo ofanayo kwenza niqhelane.
UStacey, undwendwe oluseOklahoma City uthi, “Akunyanzelekanga ukuba umbuki zindwendwe abe ngumhlobo wam osenyongweni, kodwa kufuneka abe ngumntu endiziva ndikhululekile ukuhlala naye. Iprofayile yakhe ibonisa uhlobo lomntu anguye ize ibonise ukuba kuza kubanjani ukuhlala kwakhe.”
Ukufumana iinkcukacha ezingakumbi kwangaphambili kunceda iindwendwe zigqibe ekubeni indawo yakho izilungele na izinto ezizifunayo kuhambo, ngoxa kunongela nobabini ixesha nomsebenzi. UStacey uthi, “Iyayinciphisa imiyalezo ethunyelwayo ibe yenza ukubhukisha kube lula nangakumbi, kuba imibuzo yam sele iphenduliwe.”
UChris, iSuperhost yaseMacon, eGeorgia, usebenzisa iprofayile yakhe yokubuka iindwendwe ukuze aqalise ubuhlobo neendwendwe. Uthi, “Ndingumntu ozithulelelyo, ibe indincede ndakwazi ukuthetha ngakumbi.”
Kwiprofayile yakhe, uChris ubhale ukuba ungumdlali othathe umhlala-phantsi oye wadlala ibhola ekhatywayo kwiiyunivesithi ezimbini ezaziwa njengezabantu Abamnyama. Ukwachaza ukuba:
- Uchitha ixesha elininzi kakhulu edlala igalufa
- Wazalwa kwiminyaka yoo-1980
- Unendawo yekofu yeendwendwe
Ukuthatha ixesha lokunika iindwendwe inkcazelo engakumbi ngaphambi kokuba zibhukishe igumbi lakho kunokunceda kudibanise iindwendwe ezithanda izinto zifanayo nezenza izinto ngendlela efanayo.
Njengoko undwendwe uStacey lusitsho, “Ukuba ndifunda ukuba umbuki zindwendwe ‘uchitha ixesha elininzi’ ecula i-karaoke, ndiyazi ukuba uza kulindela olunye uhlobo londwendwe kunombuki zindwendwe ‘ochitha ixesha elininzi’ ebukele uNetflix.”
Inkcazelo ekweli nqaku isenokuba itshintshile emva kokuba lipapashiwe.